Пыхусыхум зэрыпэщ1этын 1эмалхэм топсэлъыхь

СПИД-мрэ узыфэ зэрыц1алэхэмк1э республикэ сымаджэщым и дохутыр нэхъыщхьэ, профессор Иуан Маринэ мазаем и 17-м иригъэк1уэк1а пресс–конференцыр пыхусыхум   зэрызиубгъум, абы зэрыпэщ1этыпхъэ 1эмалхэм теухуауэ щытащ.

Абы къызэрыхигъэщамк1э, пыхусыхур   нэхъыбэу илъэсищым нэмыса сабийхэм,  илъэс 60-м щхьэдэхахэм, фошыгъу уз, гу уз, лы лей зытелъхэм къатохьэлъэ.

— Псом япэрауэ, сымаджэ ухъуауэ гурыщхъуэ зэрыпщ1у, 1эпкълъэпкъым зебгъэгъэпсэхун, ц1ыхум уахэмыхьэу, унэм ущ1эсын хуейщ,- же1э дохутырым.  Сэ сыщылажьэ къудамэм уз зэрыц1алэ ефык1ыу (пыхусыхури хэту) ц1ыху  30 щы1эщ. Ауэ иужьрей тхьэмахуэм ди сымаджэхэр нэхъ мащ1э хъуащ.

Гриппымрэ ОРВИ-мрэ зэрызэщхьэщык1ым и гугъу щищ1ым, Иуаным жи1ащ гриппыр нэхъ зэрыгъэхъужыгъуейр, абы нэгъуэщ1 узхэри къызэригъэхъейр.

Иуаныр тепсэлъыхьащ плъыржьэрым (температурэм), хущхъуэ къудей мыхъу, ди анэшхуэхэр абы зэрыпэщ1эту щыта 1эмалхэр къэбгъэсэбэпынри зэрыф1эигъуэр.

— Пыхусыхум и процент 70-80-м а 1эмалхэмк1э   уапэлъэщынущ. Псом нэхъыщхьэращи, узыфэр къыппкъырыхьэу гурыщхъуэ зэрыпщ1у, псы, шей, компот хуабэ нэхъыбэ уефэу унэм ущ1эсынырщ нэхъ хущхъуэф1ыр. Махуэ-махуит1к1э нэхъыф1 укъэмыхъумэ, дохутырым зыхуэбгъэзэн хуейщ, узыр хэмыужьыныхь щ1ык1э. Уз гъэт1ылъа зи1э ц1ыхухэм пыхусыхур къазэрыпкърыхьэу ик1эщ1ып1эк1э дохутырым зыхуагъэзэн хуейщ, — же1э Иуан Маринэ.

Сабийхэм я адэанэм яхуэгъэзауэ абы жи1ащ ар сымаджэ хъуауэ гурыщхъэу зэращ1у сабий садым яшэнк1э 1эмал зэримы1эр. Сыхьэт 24-м къриубыдэу сабийр нэхъыф1 мыхъумэ, шхэнефэн имыдэмэ 1эмал имы1эу дохутырым деж нэгъэсын хуейщ.

Пыхусыхур зомыгъэк1уал1эу узэрыпэщ1эт хъуну 1эмалхэм ящыщу Иуаным къыхигъэщащ пщэдджыжьым унэм укъыщ1эмык1 щ1ык1э 1эмал имы1эу ушхэн зэрыхуейр, уи пэ к1уэц1ым аксолиновэ мазь щыпхуэн хуабэу зыхуэпэн, пхъэщхьэмыщхьэ куэду пшхын зэрыхуейр, нэгъуэщ1хэри.

Профессорым гу зылъытапхъэу къигъэлъэгъуащ   куэдыр зэса римантадин хущхъуэм иджырей пыхусыху л1эужьыгъуэр зэрыхуэмыгъэхъужыр.

Гриппым зэрызыщыпхъумэфыну 1эмалхэм ящыщщ а узыфэр къежьэным зы мазэ ипэк1э абы зэрыпэщ1эт хущхъуэ зыхебгъэлъхьэныр.

Щомахуэ Залинэ, «Адыгэ псалъэ»